PENAMPANG: Sunduvan Kaamatan doid Hamin Penampang nokosindak miampai kinoikatan di Huguan Pogun (TYT) Tun Juhar Mahiruddin om Toh Puan miampai kinoomungan di Huguan Siou Tan Sri Joseph Pairin Kitingan doid moginakan.
Minoboos ih Poniikoon Kaamatan Hamin Penampang 2023 KK Jeffrey Linjungan do naangazan tavasi diho nopo nga iso kinodimpoton pinomuangkaban di Kumoduvo Polosidin Koisaan Koubasanan Kadazan Dusun (KDCA) Datuk Seri Dr Clarence Bongkos Malakun.
“Nobihinan zikoi haid di Datuk Clarence montok monguhud tavaavasi do kapamalamazan Kaamatan doid Hamin Penampang om kounsikaan kozo tu avasi kinodimpoton miampai sokodung toinsanan puu komiti mangazu,” ka dosido.
Di kahapas oh abaabazan kinopoimaganan doid hintuun Hongkod Koisaan, nokotindapou ih TYT miampai tinanud di Huguan Siou Pairin doid Hamin Penampang montok minonoimo titaak asil pomutanaman pinotunui di Datuk Clarence.
Kahapas iho ka di KK Jeffrey, minamung ih Huguan Siou moginakan miampai puu komiti monoina Kaamatan Hamin Penampang sabaagi ponongkotohuadan kumaa Bambaazon tu minanaak asil tavasi poompus timpu kalaja di toun nakatahib.
Pinopointahang nogi KK Jeffrey tu isido po nogi vagu oh Mohoingon Kampung do Kg Ramayah do mininggisom izioho pinopotounda panaandakan doid Hamin Penampang montok kotombuhuzan do momuu’an ngavi om tuhun ginumuan.
Tumanud di KK Jeffrey do nouhud dioho pinopotounda takanon, tinumon om kopomohiisan montok tindapou ngavi hohobi no kozo tuhun ginumuan mantad uvang Penampang om Putatan.
Naamot diho, noboos di KK Jeffrey do nokotounda nogi haid izioho montok monoimo pisaamaan kotindapaan di Huguan Montili Datuk Seri Anwar Ibrahim doid Hamin Penampang.
“Sundung au nododizan di Huguan Montili Anwar tuminombuhui doid Hamin Penampang sasabap no do katangkangaan kalaja nga tomoimo do nokosindak oh sunduvan koubasanan doid Hamin Penampang,” ka dau.
Poingkuo po ka di KK Jeffrey, nung nododizan di Huguan Montili Anwar minikot doid Hamin Penampang, tantu no kozo do poinsindak po vagu oh sunduvan kapamalamazan tumanud palan nouhud di Datuk Clarence.
