Au moboros sandad kobungou kointutunan tinaru, ka di Dr. Jeffrey

TAMBUNAN: Obungou oh kotutukon do kointutunan tinaru tokou nung pologoson no do au moboros id boros sandad kumaa tangaanak id walai om sinukadan kawawagu ngawi.

Minoboros ih Kumoduwo Boyoon Montiri Datuk Seri Dr. Jeffrey G. Kitingan do ilo no ontodon do atagak oh boros ih mogowit do atagak oh kointutunan tinaru.

“Au tokou mumang poimbulai sinakagon di au kaanu pointutun tinaru maya boros, kotutun do tinaru sabaagi Dusun, Kadazan, Lotud, Rungus nga au karati boros doulu po di om koilo moboros,” ka di Dr. Jeffrey tu isio po nogi kawagu oh Montiri Pomutanaman, Ponginsadaan om Pomorunan Taakanon Sabah.

Sabaagi Kumoduwo Porosidin Koisaan koubasanan Kadazan Dusun (KDCA), pinosotol di Dr. Jeffrey do ilo no kobolingkangan tagayo om kobungou do kointutunan tinaru tokou.

Noboros di Dr. Jeffrey ilo di ontok pinopoimagon kinopomupusan do Bengkel Otografi, Kamus om Bloom nayu do Koisaan Kopomogompian Boros Dusunik Sabah (KBDS) hiti di Tadau Koonom.

Poingampai nogi potindapou do ontok dilo ih Montiri Komulakan om Sipoot Datuk Ellron Alfred Angin, Upisor Watas Tambunan Sobitun Makajil, Porosidin KBDS Datuk Lawrence Gimbang, Luguan Iksokutif Kotinanan Monoina Boros Kadazandusun Rita Lasimbang, Koordinator Summer Institute of Linguistic (SIL) Malaysia Dr. Mark T. Miller, Potunud Multilinguial SIL Joenim Maratin om ih Luguan Watas Tambunan Philip P. Kitingan.

Ontok bengkel sominggu notindapaan do mongingia om susumikul mantad SK Pekan, SM St Martin om SMK Desa Wawasan dilo, soginumu do tolu topik pinibarasan.

Topik ngawi dilo nopo nga kaampai no otografi, komoiboros eksiklopedia om Bloom (mongulud susuian).

Tinimungan KBDS binuruan di Lawrence miampai di Petrus F. Guriting nopo nga noturidong om nokorijisto id Koupisan Koporijistahan Kotinanan Malaysia (RoS) di duwo toun nakatalib.

Tumingan oh KBDS mongunsub tinaru tokou moboros id boros Dusunik tumanud dialek sompoopori mooi do au atagak oh boros sandad tokou do sogiigisom.

Mantad dilo, agayo kalansanan di Dr. Jeffrey do angkab tagayo KBDS dilo kaanu sokodung mantad toinsanan kapaampai do komolohingan, mogigiyon, sikul, koupisan om kotinanan ngawi do okon ko porinta. – Di Henry Bating om Mark Ronnald Malajim.