PENAMPANG: Kinotombuhuzan di Vozoon Montili Datuk Seri Hajiji Haji Noor doid Hamin Penampang nataandak kozo miampai koubasanan Kadazan binuu’an di Kumoduvo Polosidin Koisaan Koubasanan Kadazan Dusun (KDCA) Datuk Seri Dr Clarence Bongkos Malakun.
Iho nopo nga miniondot kapanaandakan tadau koiso do kalamazan Kaamatan Nazatan Pogun Sabah doid Hongkod Koisaan ih notindapou nogi di Huguan Siou Tan Sri Joseph Pairin Kitingan.
“Koponoimaan kotombuhuzan di Vozoon Montili nopo nga kapanau doid hintuun Hamin Penampang om sumusuut dii sumaakoi doid hivang savat hamin montok pogituutubungan koubasanan,” ka di KK Jeffrey Linjungan, Poniikoon Kaamatan Hamin Penampang 2023.
Kinoikatan di Hajiji doid Hamin Penampang hobi poguhu nataandak miampai sumazau songovian om kahapas ii suminaakoi doid savat hamin montok abaabazan koubasanan sumusuut.
Miaga tomoimo, ogumu abaabazan nouhud doid Hamin Penampang kapaampai do tagung koubasanan, tinimungan tuunizon om huhumozou Kadazan, pokitanan kointutunan om nogi pogiihangan makan om minum montok tindapou ngavi hohobi po do mogiigizon uvang Penampang om Putatan.
Nokotindapou nogi doid Hamin Penampang oh hansanon Unduk Ngadau ngavi mantad uvang pototongkop pogun montok minongoi amung do kalamazan om monongkisuau miampai tombuhui om tindapou ngavi.
Poingampai nogi doid kinotombuhuzan diho ih Poniikon Kaamatan Pogun Sabah Datuk Seri Dr Jeffrey G Kitingan, montili kabinet om panakadai montili pogun Sabah, tombuhui mantad Sarawak om nogi tuhun kigaagaa polinta hongkod.
Ontok tadau kopupuson kalamazan Kaamatan 31 Mei, nouhud do kotindapou ih Huguan Pogun Sabah Tun Juhar Mahiruddin om savo miampai di Huguan Montili Malaysia Datuk Seri Anwar Ibrahim.
